حقنا في الكلام

الكلمة ايد
الكلمة رجل
الكلمة باب
الكلمة نجمة كهربية في الضباب
الكلمة كوبري صلب فوق بحر العباب
الجن يا احباب
ما يقدر يهزموا
فاتكلموا
اتكلموا
اتكلموا

Tuesday, June 12, 2012

النائب السلفي وطيور الظلام


السلفيين انكشفوا وبانوا وكسفوا الإسلام معاهم، بيتاجروا بالدين وواخدينه ستار عشان يعملوا عمايلهم السودا، بقى لهم 5 شهور في البرلمان ماعملوش حاجة الدقون المنافقة دي...وييجوا كمان يعملوا فعل فاضح في الطريق العام وعايزينا نسكت لهم؟ .
طبعاً دي المقدمة اللي ناس كتير تحب تقراها هنا، معلش عليكوا واحد.
فجأة وبدون سابق إنذار البلد مابقاش ليها شغلانة غير نائب مجلس الشعب من حزب النور، واتنشر إنه كان في وضع مش مظبوط مع بنت.
وعينك ما تشوف إلا النور يا مؤمن، الناس كلها نشرت اسم النائب واسم البنت كأنهم كلهم شافوهم بعينيهم وهم لا مؤاخذة بيعاشروا بعض، والنيابة طبعاً زي ما احنا عارفين زي الفاروق عمر، أول ما شمت خبر إن حد من حدود الله انتهك نزلت فوراً تشوف شغلها وحبسوا البنت 15 يوم (البنت بس ها)  وقال إيه النيابة عايزة تعمل لها كشف عذرية، وطبعاً لا ننسى دور الشرطة الباسلة اللي ظبطت النائب في هذا الوضع الخطير، ودور الشرطة في حماية وحفظ الأمن العام.
نبدأ التهزئ واحدة واحدة:
الإعلام: انتوا أوساخ، إلهي تولع الفلوس اللي بتشوهوا صورة الناس أو بتفضحوهم عشانها، بس
الشرطة: اللي بتعملوه في الناس بيطلع عليكوا على فكرة، اصبروا بس بكرة تلاقوا سيرة ستاتكم على كل لسان
النيابة: أقولها ازاي بس؟ مفيش حاجة اسمها كشف عذرية، طبياً مفيش حاجة اسمها كشف عذرية، البنت بتحتفظ بجزء من غشاء البكارة ، حتى بعد المعاشرة، ودي حاجة ماتتعرفش بالنظر. السؤال الأهم انتوا مالكوا؟ انتوا مالكوا؟ يعني إيه بنت كانت راكبة عربية مع واحد يتعمل لها كشف عذرية، حتى لو فعلاً كانوا في وضع حميمي؟ انتوا مالكوا؟ مين اللي ادالكوا الحق تتعدوا على خصوصية وجسد بنت بالشكل ده؟ الرويني وعتمان والسيسي وأحمد عادل الموجي طبعاً ودي فيها كلام. 
الناس: الناس اللي هو حضرتك، أيوة حضرتك اللي خبطت شير على الخبر من غير ما تفكر، اللي نشرت اسم النائب واسم البنت وتفاصيل الخبر كأنك شفتهم بنفسك في صالون بيتهم...مفيش مخ؟ فجأة بقينا نصدق الشرطة بتاعة مفيش قناصة ومفيش خرطوش؟ فجأة بقت أعراض الناس وسمعتهم لعبة ممكن تدمرها في ثانية وانت مش واخد بالك؟ وعايزين الثورة تنجح؟ خسارة فيك ميت ثورة يا شيخ! أنا مش هاعمل فيها الشريفة الخضرا وأقعد أنصح...بس اللي مش شايف إن الحادثة دي وتضخيمها بالشكل ده ليها هدف من اتنين: تصفية حسابات مع النائب ده بالذات، أو مع البرلمان ككل عشان الناس تفقد الثقة فيهم فيقبلوا في أي حل يقدمه العسكر، يبقى أعمى. هو مش ربنا أمر بالستر يا شعب يا مؤمن؟ ولا هو الفراغ وحش قوي كده؟
بقينا سويسرا وخلاص المشاكل كلها اتحلت ومش فاضيين غير للفضايح؟ هانفضل نرجع لعصور الظلام كده لحد امتى؟ أنا ماليش دعوة النائب عمل إيه وماعملش إيه، ماليش دعوة خالص، الكابوس بالنسبة لي هو ناس عندها استعداد تصدق الشرطة اللي قتلوا ألف  شاب وخدوا براءات وتنشر أخبار عن شخصية عامة من غير ما يتأكدوا (وحتى لو متأكدين، هو مش ربنا أمر بالستر يا ناس؟)  خصوصاً إنه سلفي فهنيالك لو بتكره الإخوان والسلفيين بقى...والأسوأ طلب النيابة إن يتعمل لها كشف عذرية...النيابة، المتعلمين بتوع المدارس! بعد كده يرجعوا يلوموا "الجهلة" والأميين على حال البلد ومفيش حد معيشنا في الضلمة غيركم!

Tuesday, September 27, 2011

قضية كل اكتوبر

لا مش حرب 6 اكتوبر طبعا

سرطان الثدي
افتكروا حرب اكتوبر و ازاي انتصرنا فيها و علموا على شهر اكتبور انه شهر التوعية بمرض سرطان الثدي عند النساء و كمان عند الرجالة بس بنسبة نادرة جدا
المهم المرة دي لقيت اخيرا مقالة محترمة بنسبة كبيرة اوي على جوجل بالعربي و ده لينكها
يا ريت نقراها و نعمل على الاقل الفحص  الذاتي لو حسينا باي حاجة
اصلا الفحص الذاتي لازم يتعمل كل شهر اعتقد عشان نبقى عارفين ايه الوضع الطبيعي و ايه الوضع المش طبيعي
المقالة اهي، ارجو النشر، زي ما بننشر ايميلات عن تسابيح لو منشرنهاش نروح النار، يا ريت نعتبر ده كمان ثواب و منفعة و ممكن فعلا تاثر في حياة حد يكتشف المرض بشكل مبكر

Sunday, March 27, 2011

تأصل الخوف في النمط الذكوري الضعيف في مواجهة الانثى القوية

اعترف ان العنوان هو اضعف ما يكون، لكن لا داعي للتلون، احيانا تأتينا العلامات بالجملة، منذ يومين فقط تمكنت بالصدفة البحتة من مشاهدة فيلم ابنة الجنرال، فلم امريكي قديم مجمل خط تسلسل احداثه هو وقوع ما يبدو انه جريمة اغتصاب و قتل لمجندة داخل وحدة جيش امريكية و بالتحقيق وراس سلسلة من الادلة نكتشف ان المجندة لم تغتصب بس قتلت فقط و لكن كانت تمثل دور حادثة اغتصابها عندما كانت في كلية وست بوينت كان السبب وراء اغتصابها هو تفوقها الغير مسبوق في جميع التمارين و المواد الحربية و ذلك دفع اقرانها الذكور الى التخطيط لهذا الاغتصاب الذي حدث وقت تمرين محاكي لاحدى المعارك و نجحوا في تكسير عزيمتها و شعورها بالخذلان و لاضياع لان والدها الذي يتوافق كونه جنرالا في الجيش ذاته امرها بنسيان الامر حتى لا تحدث شوشرة لا يحمد عقباها و النتيجة ان الابنة دخلت ما يشبه الانتحار البطيء التي ارادت لوم والدها عنه فانتهى بقتلها و عدم اهتمام اي طرف بحقيقة ما حدث كانت الانثى هي الحلقة الاضعف، و تم كسرها يا لضعف الرجال منذ ما يقرب الاسبوع او اكثر و الاخبار تتوالى عن معرض تعذيب الجيش لبعض من الثوار وراء المتحف المصري، ثم لحقتها اخبار عن تعرض فتيات كثيرات ممن تم القبض عليهن بالوقوع تحت طائلة كشف عذرية، حتى ان ثبتت "تهمة " انها غير عذراء، يتم توجيه تهمة البغاء لها، و في اثناء هذا الكشف، تم تصوريهن و هن عرايا من قبل ضباط بالجيش قصة خيالية؟ قد تكون صحيحة قد تكون كاذبة لكن ما الذي يمنعها من الحدوث؟ قدسية الجيش؟ لم؟ لماذا الجيش مقدس و فوق الشبهات؟؟ سؤال متروك للقاريء حرية الاجابة عنه اما ما الذي يستفيده الجيش من توجيه تهمة البغاء لنشاطات و متظاهرات ينادين بحقهم في التظاهر و الحياة الكريمة، فهذا ما فشلت في فهمه، نعم، قد تبدو الاجابة المنطقية هي ان الجيش بذلك يرهب الفتيات عن النزول الى المظاهرات و الوقفات و الاحتجاجات خصوصا بعدما راى من قوة بأس و شدة العزيمة و صلابة الراي ما فاق توقعاته، لقد راى الجيش المصري خاصة و الجيوش العربية الاخرى كل في بلده حسب ما يحدث حين تصحو المقاتلة الشرقية من سباتها و تؤمن بكيانها كمكافيء للرجل ان لم يكن افضل منه العجيب في الموضوع ان استهتار الجيش اصبح مرئيا للداني قبل القاصي و مع ذلك ما ان انتشر الخبر و خصوصا على يد "مرة"كان ابسط شيء تم توجييه من تهم هو عدم مصداقية الخبر، حيث ان العفو الدولية "متعوووودة" دايما تفبرك اخبار غلط عن مصر، نعم انها نظرية المؤامرة التي لحست عقل الشعب العربي عن اغلبه و اصبحت كل من تصدق الخبر هي في حكم العاهرة، و لم لا، فمن سوف تشهد للعروسة الا امها؟ و في هذة الحالة من سوف تشهد للعاهرة الا عاهرة مثلها؟ عزيزاتي ، كلنا عاهرات بحكم الرجل الشرقي و كان مساء حزينا ثم صباحا احزن مما يكون ان تصحو على فيديو لانثى في قمة حالات الفزع تستغيث علها تجد العون من كلاب القذافي الذين اغتصبوها و لا تجد من يقف بجانبها و يتم سحبها كما تسحب الشاة يوم عيد الاضحى، فهو صباح يوم حزين جدا و مرة ثالثة و عاشرة و مليون، تكون الانثى هي الهدف الاكثر استضعافا و يكون جسدها هو مسرح هذا الاستضعاف و ملكيتها الخاصة مشاعا لكل من هب و دب، و يكون العقاب هو رد الفعل ان قررت ان تثور او ترفض و يكون الثمن غاليا عذريتها التي لا اهمية لها اذ ان البقرة لها عذرية القطة لها عذرية هي الاخرى و لكن الاهمية تكمن في المجتمع الذي وضع سعرا لهذة العذرية و في نفس الوقت قرر ان يسلبها منها غصبا و عنوة فقط ليدينها بهذا الفقد عزيزتي المراة الثائرة، لا تخدعنك مساوة المراة بالرجل في الميدان فهي لا تعني اي شيء لاي رجل اخر، حتى و ان كان بدوره ثائرا هذة الشخصية التي تدعي الثورة ، لاني لا اريد ان اخلط بين جميع الرجال لان فيهم الشرفاء،هي تلك الشخصية التي لا ترى في المراة الا وعاء جنسيا لتفريغ شهواتها من طرف واحد،و هي شخصية تدعي التحرر فقط حتى تحصل على الجنس كلما امكن مثل كلاب الشوارع، في اي مكان، مع اي فرج، عزيزتي المراة ، هذة الشخصية المتحررة هي نفسها هذة الشخصية التي ان تحول المجتمع الى مجتمع ديني بالدرجة الاولى، سوف تكون هذة اول شخصية تقرر التخلي عن "تحررها"، سوف تكون هذة اول شخصية تربي الدقن الغير مهذبة، و تقصر طرف الجلباب و تتزوج من النساء اربعة و ما ملكت ايمانه ان استطاع، هي الشخصية التي سوف تستغل الدين اسواء استغلال لهرس اي شخصية انثوية تقف امامها و لا تقدر على اسكاتها لغياب منطقه و ضعف حجته عزيزتي الثائرة متفرحيش اوي كدا

Tuesday, October 26, 2010

أكتوبر شهرك...تمتعي بصحتك

أحد الأنشطة التي تنظمها وزارة الصحة المصرية أو بعض المنظمات غير الحكومية هي "السباق من أجل الشفاء وهو سباق يقام بالقرب من منطقة الأهرامات ومن المفترض أن هدف السباق هو زيادة التوعية بسرطان الثدي.
وجدت أحد دعاوي هذا السباق في مقهى راق، وتحتوي الدعوة على مكان وتوقيت السباق وكيفية الاشتراك إلا أنها لا تحتوي على أي معلومة صغيرة كانت أو كبيرة عن سرطان الثدي والفحص الدوري وكيفية الوقاية منه، أي أن على من تريد نشر التوعية أن تسدد قيمة الاشتراك في السباق وتشترك فيه وإلا فلا يوجد وسيلة أخرى سهلة لمعرفة سبل الوقاية من هذا المرض، وهو المفترض أنه الهدف من السباق. كما أنها وسيلة طبقية إلى حد كبير، فهذا المقهى لا ترتاده سوى نساء من شرائح اجتماعية ميسورة.
على عكس هذا الأسلوب للتوعية، وصلت إلي بطاقة تصممها منظمة الصحة العالمية عليها الشريطة الوردية الشهيرة وبها إرشادات سهلة وبسيطة:
إذا كان عمرك من 20 إلى 40 عاماً، أجري فحص الماموجرام مرة كل ثلاث سنوات
أما السيدات فوق سن الأربعين فعليهن إجراء الفحص مرة كل عام
وجهاز الماموجرام متوافر في مراكز الأشعة الخاصة (للأسف فقد سألت في بعض المستشفيات الحكومية فوجدت أن الجهاز إما معطل أو يتطلب الكشف بعض الإجراءات المطولة والزيارات المتعددة) ويبلغ تكلفة الكشف في المركز الذي سألت فيه 250 جنيهاً
تذكرن يا عزيزاتي أن هذه التكلفة زهيدة للغاية مقارنةً بتكاليف العلاج
وأن الكشف الدوري ما هو إلا وسيلة للاطمئنان أنك بحالة جيدة، لذلك فهو في الغالب مصدر ارتياح أكثر من كونه مصدر قلق
تمتعن بصحتكن...وواظبن على الكشف الدوري

Monday, October 11, 2010

عزيزتي المراة، هل اتاكدتي ان الديودرانت بتاعك خالي من الومنيوم كلوروهيدرات؟؟




"NO aluminum chlorohydrate" & hypoallergenic fragrance and paraben free.
هام جدا:
اي ديودورانت نستخدمه ينصح انه يكون خالي من الومنيوم كلوروهيدرات و يكون خالي من البرابين و مافيهوش اي عطور روائح
ليه؟؟
عشان المواد دي بتسبب سرطان ثدي للستات خصوصا و بشكل عام ممكن تسبب سرطان غدد ليمفاوية
الماركة دي فعالة جدا و عن تجربة
ممكن ماركات تانية طبعا بس اهم حاجة ميكونش فيهم المكونات الي فوق و يستحسن كمان مافيهومش كحول لانه بيعمل ريحة و تفاعلات مع الجسم
اعتقد انه متكون من الشبْة اللي بنجيبها من عند العطار، و نفس الشبة مفيدة و احسن، صحيح الطب اضمن من وصفات تقليدية كتيرة بس مش كل من كان قديم يبقى غلط

هابي مرأة داي

Friday, August 20, 2010

أعمل إيه لو عربية مشيت ورايا في الشارع؟

شكل من أشكال التحرش الجنسي اللي احنا البنات لازم ناخد نصيبنا منه كل يوم هو التحرش بالعربيات، الواحدة بتبقى واقفة أو ماشية لا بيها ولا عليها تلاقي راجل قد أبوها راكب عربية فارهة ويزمرلها أو يقف لها أو حتى يقول لها "تيجي ساعة وأديكي 2000 جنيه؟" زي ما حصل لواحدة صاحبتي قبل كده، المواقف دي بتبقى صادمة والواحد تفكيره بيتشل عشان كده جات لي شوية أفكار ممكن نعملها لو اتعرضنا لموقف زي ده، بس قبل أي حاجة لازم نتفق إن مفيش موقف ممكن تاخديه هيبقى نتيجته السلامة 100%، لكن في رسائل غير مباشرة لازم توصليها للمتحرش:
1) بشكل عام حاولي تمشي عكس اتجاه العربيات في جميع الأحوال، وده سهل لو الشارع اللي ماشية فيه واسع واتجاهين.
2) لازم تاخدي موقف، عشان لو كملتي مشي المتحرش والناس اللي في الشارع اللي احتمال يقفوا جنبك مش هيقولوا إنك خايفة أو مكسوفة أو مطنشة، هيقولوا مبسوطة.
3) لو ماشية مع اتجاه العربيات ولقيتي عربية مبطأة جنبك لفي وإرجعي على طول وعدي الشارع وإمشي من غير ما تبصي للعربية بس تبقى متابعاها بطرف عينك عشان تشوفي هو ماشي إزاي.
4) لو الموضوع طول والطريقة التانية ماجابتش فايدة، لازم تاخدي خطوة أكبر، أقفي وإعملي نفسك بتتكلمي في التليفون مع والدك أو أي ولد وأوصفيه له الموقف، أنا بقول مثّلي الموضوع ده لإن في أغلب الأحيان الموضوع مش حيحتاج تدخل أطراف تانية وتبقى خناقة وضرب إلخ.
5) لو الموضوع طول زيادة واضطريتي تردي على الكلام ماتشتميش وردي بحسم "سيبني في حالي" أو "أنا حاجيبلك أخويا يتفاهم معاك" أو "إنت شايفني إيه" كده يعني.
6) نصيحة برضو في جميع الأحوال، شيلي معاكي برفان أو سبراي مزيل للعرق، قبل كده كنت في شارع مضلم شوية ولقيت واحد واقف لي تحت الشجرة، طبعاً خفت وماعملتش أي حاجة غير إني طلعت الاسبراي من شنطتي وبينتهولوه، غالباً خاف منه وماعمليش حاجة.

Monday, March 8, 2010

هو يوم للمراة


اول مرة اخد بالي ان حفلة توزيع الاوسكار هي نفس ليلة يوم المراة العالمي و مش عارفة هل فيه رابط بينهم السنة دي بالذات و لا انا اللي بيتهيئلي . لاني حسيت ان جمال الحفلة كان في الممثلات الموجودين فيه، مش عشان لبس او فساتين او غيره، لكن لان ابسط مثال الخمسة المرشحات لاحسن ممثلة و المرشحات لاحسن ممثلة مساعدة، فعلا قدموا ادوار قوية و تمثيل بارع، و كمان مكنتش ادوار عادية، ادوار كانت مهتمة بدور الام و التربية و ظهور المراة و الاشارة لدورها و ازاي ممكن يكون مهم و محوري جدا، يمكن كمان حصور كاثرين بيجالو على احسن مخرجة و كمان احسن فلم هي اخرجته كان له معنى كونها فازت على اربع مخرجين اتنين منهم مخضرمين جدا زي كونتين تارانتينو و جايمس كاميرون، الممثلة الافرو امريكة الجديدة صاحبة دور البطولة في فلم بريشوس كانت جديدة تماما و مع ذلك اثبتت نفسها بجدارة في اداءها في الفلم و لاول مرة كمان كانت تمثل.
يمكن ظهور الكم الكبير ده من الممثلات ده خلاني اعمل مقارنة بين حال المراة هناك و حال المراة هنا، طبعا فيه ناس حتفكرني بشجع "العري" و الانحلال و الفسوق و العياذ بالله عشان كانوا كلهم خارجين مش لابسين حجاب او فساتين مقفولة و بديهات كارينا تحت الفستان البدون اكمام. لكن الحقيقة اني قارنت بين انجازاتهم كستات و انجازتنا احنا، بين نظرة الرجالة ليهم هناك و بين نظرة الرجالة لينا هنا، بين نظرة المجتمع ليهم ككل و ببين نظرة المجتمع بتاعنا هنا ككل لينا برضو.

فكرت لقيت ان هيئة الاكاديمية لما رشحت الممثلات و المخرجات و اي واحدة تانية اشتغلت في اي دور حصل في انتاج الفلم او توزيعه او الخ الخ الخ، مبصتش ليها عشان هي ست بقدر ما بصت ليهم على اساس انهم اشخاص عقلانيين متفردين و ليهم موهبة ما و انهم بذلوا جهد في اظهراها و صقلها وتنميتها، الهيئة مبصتش لشكل واحدة فيهم بقدر ما بصت لايه اللي عملوه، الاهم من كل ده ان الهيئة الاكاديمية و المجتمع ككل و الرجالة المتواجدين في حفلة اليوم مكنوش شايفينهم ناقصات عقل او دين او وعي كونهم ستات و بيحيضوا مرة كل شهر و انهم بكدا غير قادرين على عمل شيئ بنفس مستوى اي راجل تاني فقط لكونه راجل.
لكن الاهم ان كل من الستات دول مخليتش اي عامل معيق لها يمنعها من عمل ما تعمله ايا كان حجمه او نوعه او شكله، فمثلا كاثرين بيجالو مقالتش ليه اعمل فلم عن الجنود في العراق و انا مالي، الفلم ده يخرجه راجل، مثلا هيلين ميرين مقالتش و انا ليه امثل و اتعب قلبي مادام الدور الاصلي لكرسيتوفر بلمر في دور تلستوي و انا بس الست معاه، و امثلة تانية كتيرة نابعة من كون ان المراة هناك، هناك ده اللي هو اي قطعة على وجة الارض غير الوطن العربي و خصوصا مصر، مؤمنة بنفسها و مش مستعدة تخلي اي حاجة توقفها عن طريقها. مافيش واحدة طلعت قالت هناك و ليه تخرجي، ما تخلي الاخراج للرجالة و احنا يدوبك تمثل، مافيش واحدة خرجت تقول و احنا ليه ننتج، ليه نصور، ليه نمنتج صوت او نعمل تصميم ملابس، ليه نالف موسيقى او نوزع نغمة؟؟ ليه اعمل اي حاجة مادام فيه راجل بيعملها؟؟ مافيش واحدة قالت كدا، كل واحدة عشقت شغل معين و اصرت انها تكمل فيه مهما كان سابقها في نفس المجال عدد من الرجالة اللي اثبتوا جدارتهم، لان الفكرة ببساطة مش مين عمل ايه قبلي و بناء عليه خلاص مفايش فايدة من عمله، لا، كل واحدة من دول شفات انها مصرة تبين وجهة نظرها و مؤمنة بنفسها كانسان مش امراة، فهي مش محتاجة تحارب، بس مؤمنة بحقها الطبيعي مش حقها كفئة مهمشة و قليلة.


"
"

عزيزتي المراة، الفراغ المنقور اعلاه هو ليكي، يا ريت تقولي لي انت شايفة نفسك ازاي و ليه، هل امراءة و انسانة و لا امراة فقط و مصرة على الحصول على كامل حقوقك "الانسانية" ام امراة ناقصة عقل و دين و مؤمنة كامل الايمان انك غير قادرة على الاتيان ببعض الاعمال منهم كونك تبقي قاضية او وكيلة نيابة او جزارة او مجندة بتخدم بلدها . دعوة مفتوحة للجميع للتعبير عن نفسهم و لو في مقال منفصل و اشعاري بيه لو سمحتم، لكن عذرا، ان كنت ترين انك ناقصة عقل و دين، و لست مؤهلة، فتكلمي عن نفسك فقط دون تعميم رايك و الزام الاخرين به.
سؤال، هل بزوال الحيض عن المراة تنتفي كونها مراة و تصبح عاقلة ؟؟؟ و هل في زوال الحيض عن المراة اقلال من شانها او انتهاء لدورها في الحياة بعد ما خلفت و ربت و خدمت؟؟ سؤال بوجه للمراة اللي شايفة نفسها ناقةص عقل و دين بسبب حيضها اللي ربنا خلقها بيه .