حقنا في الكلام

الكلمة ايد
الكلمة رجل
الكلمة باب
الكلمة نجمة كهربية في الضباب
الكلمة كوبري صلب فوق بحر العباب
الجن يا احباب
ما يقدر يهزموا
فاتكلموا
اتكلموا
اتكلموا

Friday, August 20, 2010

أعمل إيه لو عربية مشيت ورايا في الشارع؟

شكل من أشكال التحرش الجنسي اللي احنا البنات لازم ناخد نصيبنا منه كل يوم هو التحرش بالعربيات، الواحدة بتبقى واقفة أو ماشية لا بيها ولا عليها تلاقي راجل قد أبوها راكب عربية فارهة ويزمرلها أو يقف لها أو حتى يقول لها "تيجي ساعة وأديكي 2000 جنيه؟" زي ما حصل لواحدة صاحبتي قبل كده، المواقف دي بتبقى صادمة والواحد تفكيره بيتشل عشان كده جات لي شوية أفكار ممكن نعملها لو اتعرضنا لموقف زي ده، بس قبل أي حاجة لازم نتفق إن مفيش موقف ممكن تاخديه هيبقى نتيجته السلامة 100%، لكن في رسائل غير مباشرة لازم توصليها للمتحرش:
1) بشكل عام حاولي تمشي عكس اتجاه العربيات في جميع الأحوال، وده سهل لو الشارع اللي ماشية فيه واسع واتجاهين.
2) لازم تاخدي موقف، عشان لو كملتي مشي المتحرش والناس اللي في الشارع اللي احتمال يقفوا جنبك مش هيقولوا إنك خايفة أو مكسوفة أو مطنشة، هيقولوا مبسوطة.
3) لو ماشية مع اتجاه العربيات ولقيتي عربية مبطأة جنبك لفي وإرجعي على طول وعدي الشارع وإمشي من غير ما تبصي للعربية بس تبقى متابعاها بطرف عينك عشان تشوفي هو ماشي إزاي.
4) لو الموضوع طول والطريقة التانية ماجابتش فايدة، لازم تاخدي خطوة أكبر، أقفي وإعملي نفسك بتتكلمي في التليفون مع والدك أو أي ولد وأوصفيه له الموقف، أنا بقول مثّلي الموضوع ده لإن في أغلب الأحيان الموضوع مش حيحتاج تدخل أطراف تانية وتبقى خناقة وضرب إلخ.
5) لو الموضوع طول زيادة واضطريتي تردي على الكلام ماتشتميش وردي بحسم "سيبني في حالي" أو "أنا حاجيبلك أخويا يتفاهم معاك" أو "إنت شايفني إيه" كده يعني.
6) نصيحة برضو في جميع الأحوال، شيلي معاكي برفان أو سبراي مزيل للعرق، قبل كده كنت في شارع مضلم شوية ولقيت واحد واقف لي تحت الشجرة، طبعاً خفت وماعملتش أي حاجة غير إني طلعت الاسبراي من شنطتي وبينتهولوه، غالباً خاف منه وماعمليش حاجة.

4 comments:

^ H@fSS@^ said...

100 ya wild heart

GURU said...

افكار كويسة بس تعتبر مسكنات, مش حقدر الومك او الوم اي بنت انها تعمل كده
التحرش بقي ورم سرطاني لا علاج له سوي المسكنات دي وفي الاخر لا فائدة
اصبحنا كلنا بنعيش في حمام عمومي كبير
نهاية الظاهرة لازم تكون من تعليم الاطفال الاحترام المتبادل بين فئات المجتمع

متفكرنيش منحل ولا فاسق ولا ماجن لو قلت لك لازم الاختلاط يكون موجود في المدارس من حضانة حتي المرحلة الجامعية حتي يتم كسر حلقة الحرمان اللي موجودة عند الشباب

اسف للاطالة
تحياتي

http://shab-masry93.blogspot.com/

^ H@fSS@^ said...

انا اتفق مع جورو
و كلامك لا منحل و لا غير اخلاقي
انا عن نفسي كنت في مدرسة اسلامية و مع ذلك كنا لغاية ابتدائي مختلطين ببعض في الفصل و الحوش و كل حاجة
بس الفصل حصل في اعادي و بس
لكن كتنشئة محسناش انه مشكلة كبيرة و معندناش العقد دي

حلم بيعافر said...

اتقوا الله شوية

اسبراى ايه بس؟

انتوا عايزين تخلوا الراجل الطيب اللى بيعاكسكوا يعطس؟!