إيه القرف ده؟

هو اللي حنعيده حنفضل نزيده لحد إمتى بس عشان أبقى عارفة
اتفضلوا:
"لمي نفسك يا بنت بلدي" للقضاء على التحرش الجنسي
ده آخر جروب على الفيسبوك للدفاع عن التحرش الجنسي
ما هو اللي يدخل يقول أي بنت لابسة بنطلون وكات تستاهل يبقى بيدافع عن التحرش
واللي يقول اللي لابسة محتشم ماحدش بيبصلها يبقى كداب
لإن في حاجة اسمها غض بصر
وفي حاجة اسمها النظرة الأولى لك والثانية عليك
وفي حاجة اسمها المسلم من سلم المسلمون من لسانه ويده
وفي حاجة اسمها من حسن إسلام المرء تركه ما لا يعنيه
إشمعنى حافطين الآيات بتاعت الحجاب صم ومش حافطين الأحاديث دي؟
ده على اعتبار يعني إنهم بيتكلموا من وجهة نظر دينية
لكنهم لو فاهمين التدين صح مش حيفكروا بالطريقة دي
معلش علم في المتبلم يصبح فاهم
نقول تاني؟
قولوا ورايا
كل واحد حر في لبسه وربنا هو اللي حيحاسب الناس
لبس البنت مش بيدل بالضرورة على تدينها أو أخلاقها
اللي بيبص للبنات أو يتحرش بيهم لفظيا أو ينتهك أعراضهم مجرم مجرم مجرم
وحنوديهم السجن واحد واحد إن شاء الله
كل البنات بتتعرض للتحرش بدون تمييز
اللي بيشوف بنت بتتعرض للتحرش ويسكت أحسن له يغير كلمة "ذكر" اللي في البطاقة
ها فهمنا ولا لسة؟
يا مسهل

لا تكوني ضحية

قال يا فرعون إيش فرعنك؟
قال مالقيتش حد يلمني.

المثل البليغ دي ينطبق بحذافيره على مشكلة التحرش الجنسي، الرجالة اللي مبرطعين في الشارع وبيعاكسوا اللي رايحة واللي جاية بكلمات قذرة مش لاقيين حد يلمهم، الأمن معظمهم إيدك والأرض لسبب بسيط إنهم مش موجودين أصلاً في الشارع. شيء غريب فعلاً، عاصمة فيها 20 مليون شخص قرفانين وغلابة ومفقوع مرارتهم مفيش ولا ظابط يوحد ربنا يبقى موجود يفض الاشتباكات أو يحمي الناس اللي ماشية في الشارع، عشان كده لازم نلم المتحرشين بنفسنا.

المتحرشين ابتدعوا طرق وأساليب متعددة وتفننوا إنهم يعكننوا على بنات الناس لمجرد الغلاسة، على فكرة اللي بيتحرش ده مابيحسش بأي متعة مطلقاً، و"الهياج اللي بيقولوا إن احنا بنسببه نتيجة لإنهم بيفضلوا مبقحلين على جسم البنت ومابيودوش وشهم الناحية التانية لكن في النهاية برضو بيلوموا البنت.

بما إن التحرش فنون وأنواع ودرجات فنصيحة اللي يقولك كلمة مالهاش لازمة زي ما لسة واحد دلوقتي قايل لي "طير إنت !!" طنشي خالص ولا كأن حد بيتكلم...على فكرة أنا أي حد بيتنفس جنبي باتضايق بس بجد لو وقفت لكل متخلف منهم عالواحدة يبقى مانزلش من البيت أحسن.

لكن لازم، لازم، تصرخي وتزعقي وتعملي فضيحة وتخلي جموع الشعب تتلم لحد ما ياخدوه عالبوكس أو ياخده أخوكي أو جوزك أو أبوكي...إلخ لو المعاكسة ليها طابع جنسي...اللي يتكلم عن جسمه أو جسمك حتى لو بشكل غير مباشر، اللي يقول لك تعالي إعملي كذا، اللي يمد إيده قاصد، اللي يشدك من هدومك، لازم تفضحيه، مالناش كرامة من هنا ورايح لو سبناهم يهينونا كده.

لميه
لميه
لميه